Eclesiástico (Sirácida) · Biblia en eslavo eclesiástico (Biblia de Isabel)
Eclesiástico (Sirácida) 48 Biblia en eslavo eclesiástico (Biblia de Isabel)
Notas sobre este texto (3)
- Not shown: the lectionary pericope numbers (зача́ло) and the marginal glosses of the digital source. The Prayer of Manasseh stands at the end of 2 Chronicles (36:24), as in the Slavonic Bible; the prologue of Sirach and the opening verse of Lamentations are joined to verse 1.
- Church Slavonic in its traditional (Synodal) spelling, with accents, breathings and titlo abbreviations, shown in the Ponomar font (SIL Open Font License).
- Exodus 36–39 follow the Septuagint's order; the digital source has no verse divisions there, so Exodus 36:8–end and chapters 37, 38 and 39 each appear as one block.
Eclesiástico (Sirácida) no está en RV1909.
1 И҆ воста̀ и҆лїа̀ прⷪ҇ро́къ ꙗ҆́кѡ ѻ҆́гнь, и҆ сло́во є҆гѡ̀ ꙗ҆́кѡ свѣща̀ горѧ́ше:
·
2 и҆́же нанесѐ на нѧ̀ гла́дъ и҆ ре́вностїю свое́ю ᲂу҆ма́ли ѧ҆̀,
·
3 сло́вомъ гдⷭ҇нимъ ᲂу҆держа̀ не́бо и҆ сведѐ та́кѡ три́жды ѻ҆́гнь съ небесѐ.
·
4 Ко́ль просла́вилсѧ є҆сѝ, и҆лїѐ, чꙋдесы̀ твои́ми, и҆ кто̀ подо́бенъ тебѣ̀ похвали́тисѧ;
·
5 Воздви́гнꙋвъ мертвеца̀ ѿ сме́рти и҆ и҆з̾ а҆́да сло́вомъ вы́шнѧгѡ,
·
6 сведы́й цари̑ въ па́гꙋбꙋ и҆ просла́влєнныѧ ѿ ѻ҆дра̀ и҆́хъ,
·
7 слы́шавый въ сїна́и ѡ҆бличе́нїе и҆ въ хѡри́вѣ сꙋдьбы̑ ѿмще́нїѧ,
·
8 помазꙋ́ѧй цари̑ на воздаѧ́нїе и҆ прⷪ҇ро́ки прее́мники по себѣ̀,
·
9 взѧ́выйсѧ ви́хромъ ѻ҆́гненнымъ на колесни́цѣ ко́ней ѻ҆́гненныхъ,
·
10 впи́санъ во ѡ҆бличє́нїѧ на времена̀, ᲂу҆толи́ти гнѣ́въ пре́жде ꙗ҆́рости и҆ ѡ҆брати́ти се́рдце ѻ҆́тчее къ сы́нꙋ и҆ ᲂу҆стро́ити кѡлѣ́на і҆а̑кѡвлѧ.
·
11 Блаже́ни ви́дѣвшїи тѧ̀ и҆ любо́вїю ᲂу҆кра́шеннїи.
·
12 И҆́бо мы̀ житїе́мъ поживе́мъ.
·
13 И҆лїа̀, и҆́же ви́хромъ покрове́нъ бы́сть, и҆ є҆лїссе́й и҆спо́лнисѧ дꙋ́ха є҆гѡ̀ и҆ во дни̑ своѧ̑ не поколеба́сѧ ѿ кнѧзе́й, и҆ не премо́же є҆гѡ̀ никто́же:
·
14 всѧ́ко сло́во не превзы́де є҆гѡ̀, и҆ во ᲂу҆спе́нїи прⷪ҇ро́чествова тѣ́ло є҆гѡ̀:
·
15 и҆ въ житїѝ свое́мъ сотворѝ чꙋдеса̀, и҆ во ᲂу҆ме́ртвїи ди̑вна дѣла̀ є҆гѡ̀.
·
16 Во всѣ́хъ си́хъ не пока́ѧшасѧ лю́дїе и҆ не ѿстꙋпи́ша ѿ грѣ̑хъ свои́хъ, до́ндеже плѣне́ни бы́ша ѿ землѝ своеѧ̀ и҆ расточе́ни бы́ша по все́й землѝ.
·
17 И҆ ѡ҆ста́сѧ люді́й ма́лѡ, и҆ кнѧ́зь въ домꙋ̀ даві́довѣ.
·
18 Нѣ́цыи ᲂу҆́бѡ ѿ ни́хъ сотвори́ша ᲂу҆го́дное, нѣ́цыи же ᲂу҆мно́жиша грѣхѝ.
·
19 Є҆зекі́а ᲂу҆твердѝ гра́дъ сво́й и҆ введѐ посредѣ̀ є҆гѡ̀ во́дꙋ: и҆скопа̀ желѣ́зомъ ка́мень и҆ созда̀ и҆сто́чники вода́мъ.
·
20 Во дне́хъ є҆гѡ̀ взы́де сеннахирі́мъ и҆ посла̀ раѱа́ка, и҆ воздви́же рꙋ́кꙋ свою̀ на сїѡ́на и҆ возвели́чисѧ горды́нею свое́ю.
·
21 Тогда̀ подвиго́шасѧ сердца̀ и҆ рꙋ́цѣ и҆́хъ, и҆ поболѣ́ша ꙗ҆́кѡ ражда́ющыѧ.
·
22 И҆ помоли́шасѧ гдⷭ҇ꙋ млⷭ҇тивомꙋ, воздѣ́вше рꙋ́ки своѧ̑ къ немꙋ̀:
·
23 и҆ ст҃ы́й съ нб҃сѐ ско́рѡ ᲂу҆слы́ша ѧ҆̀ и҆ и҆зба́ви ѧ҆̀ рꙋко́ю и҆са́їиною:
·
24 поразѝ полкѝ а҆ссѷрі̑йскїѧ, и҆ сокрꙋшѝ ѧ҆̀ а҆́гг҃лъ є҆гѡ̀.
·
25 Сотвори́ бо є҆зекі́а ᲂу҆го́дное гдⷭеви и҆ ᲂу҆крѣпи́сѧ на пꙋте́хъ даві́да ѻ҆тца̀ своегѡ̀, ꙗ҆̀же заповѣ́да и҆са́їа, прⷪ҇ро́къ ве́лїй и҆ вѣ́ренъ въ видѣ́нїи свое́мъ.
·
26 Во дне́хъ є҆гѡ̀ воспѧти́сѧ со́лнце, и҆ приложѝ житїѧ̀ царе́ви:
·
27 дꙋ́хомъ ве́лїимъ ви́дѣ послѣ̑днѧѧ и҆ ᲂу҆тѣ́ши сѣ́тꙋющыѧ въ сїѡ́нѣ:
·
28 да́же до вѣ́ка показа̀ бꙋ̑дꙋщаѧ и҆ сокровє́наѧ, пре́жде не́же прїитѝ и҆̀мъ.
·